قصّص من وجع الشمال الغربي ” الحلقة الاولى”


.ما شين يحصدوا على كميون راكبين فيها 30 روح ، يشربوا في الماء ” حامي” و يفطروا في ” نتشة” خبز طابونة
و ” كعبات زيتون” جابتهم “خميسة” في ” القفّة” السعف..
معاهم راس بصل ” من السانية ” متع عمّك ” المولدي” إلّي بحذا الواد ….
البصل مذكور في القرآن و يعاون ” على القوايل” هذاكة البرنامج في نهار ” الشمس عاملة السنون ”
عندهم بارشا خدمة **” بالاط القرط” مازالت مستفة في آخر ” الأرض”
البريسة تحصد و هوما باش يتبّعوا من تالي يهزو على أكتافهم القمح و الشعير و البالاط يعبوهم في ” التركتور”..
و لعشيّة كل وحدة يعطيها مولا الأرض 7 لاف فرنك في النهار .. موش مشكلة ” التعب مخلوف” المهم ولدها سامي شاهي يشري ” سبادري” و مريول متع المنتخب يكوّر بيهم في “البحيرة” و خولة تحب تشري بورطابل كيف تنجح في السيزيام …..
ياخي تقلبت الكميون ..و تشقلبت في الكيّاس 4 تشقليبات … مع كل تشقليبة تكسرت حلمة و ماتت فرحة و سامي ما خذاش “سبادري” و خولة ما شراتش تلفون ……..على خاطر إلّي باش تشريلهم التلفون و السبادري …” ماتت”.
Par : غفران حسايني